Ben Madilynn
UNOM ka pamilya ang temporaryong gipabakwit sa ilang mga balay sa Brgy. Masiag, Bagumbayan, Sultan Kudarat Province human sa pagdahili sa yuta alas 4:00 sa hapon, Huwebes, Hunyo 27, 2024.
Ang pagdahili sa yuta resulta sa duha ka sunod nga adlaw nga kusog ang pagbundak sa ulan.
Matud ni Hern Aries Galve, tsirman sa Barangay Disaster Risk Reduction Management Committee (BDRRMC), nga sa inisyal nga pagsusi nila, nakita ang anam-anam nga pagkahugno sa yuta sa
Brgy. Masiag nga maoy hinungdan sa pagkaguba sa pipila ka mga balay.
Sa datus sa BDRRMO, ang mga pamilya nga gipahikling mao sila Reynold Magluyan sa Purok Sampaguita; Nelson Haguisan/Marvin Billones sa Purok Sampaguita; Antonio D. Bornezo, Jr. sa Sitio Lawaan; Alvin C. Padura sa Sitio Lawaan; Marvin D. Fuentes sa Sitio Lawaan; ug Hernane Facial, Jr. sa Sitio San Vicente.
Samtang apektado usab sa pagdahili sa yuta ang bahin sa Sitio Kawayan ug Sitio Kipuso nga dili maagian sa mga sakyanan paingon sa Sitio Falls, Sitio Blakol ug Sitio Lawaan gumikan sa pagdahili sa yuta.
Ang BDRRMC-Masiag ang nagpahinumdom sa katawhan sa maong dapit nga magpabiling alerto ug motuman sa bisan unsang pasidaan aron malikayan ang pagkakalas sa kinabuhi. (Edgar E. Fuerzas)
