Survey ratings ni Pres. Marcos, nagtalinaed a nangato; Vice Pres. Sara, naminsan manen a bimmaba
abyasa
LAOAG CITY – Napagtalinaed ni Presidente Ferdinand Marcos Jr. ti nangato nga approval ken trust rating idinto a bimmaba met ti approval ken trust ni Vice President Sara Duterte.
Daytoy ket maibasar iti kaudian a survey ti PUBLiCUS Asia Inc. no sadino iti PAHAYAG Second Quarter 2024 wenno PQ2-2024, nagtalinaed a nangato ti overall performance rating ti Marcos administration iti 51%.
Nagtalinaed met ni Presidente Marcos ti approval rating-na nga 44% ken trust rating a 33% idinto ti approval iti North Central Luzon (NCL) a maibilang a balwarte ket bimmaba iti 49% manipud iti 52% idi Quarter 1.
Dakkel ti nagbabaan ti rating ni Vice Pres. Duterte, manipud iti 53% idi Quarter 1, bimmaba iti 46% ti approval daytoy ken bimmagsak met ti trust ti lima a puntos manipud iti 46% ket nagbalin a 41%.
Dakkel met ti nagbabaan ti approval rating ti Bise Presidente iti balwarte ni Marcos iti North Central Luzon, manipud iti 47% ket nagbalin a 38% ken pakairamanan iti balwarte daytoy iti Mindanao ket dakkel met ti nagbabaan ti approval ratings ni Duterte a manipud iti 75% ket nagbalin a 68%.
Pakairamanan ti trust ratings ni Duterte ket bagsak met a manipud iti 67% ket nagbalin a 65%.
Iti naisayangkat a survey idi Hunio 15 agingga 19, 2024, sakbay pay a naglusulos iti gabinete, ni Duterte ket addaan ti kangatoan nga approval ken trust rating kadagiti opisial ti gobierno.
Sipod idi nangrugi kas Senate President ni Sen. Francis Escudero ket bimmagsak ti rating daytoy a manipud iti 58% ket nagbalin a 47% iti Quarter 2 ti approval rating ken manipud iti 45% ket nagbalin a 37% ti trust rating daytoy.
Kabayatanna, apagapaman nga immuli ti rating da House Speaker Ferdinand Martin Romuldez ken Chief Justice Alexander Gesmundo.
