![](https://trend.slink.ph/wp-content/uploads/sites/11/2024/06/SEN.-GATCHALIAN-scaled-267x150.jpg)
Sen. Gatchalian, nasken a maikkan ti pannusa a nadagsen dagiti mangipagarup a ti panagbalin a Pilipino ket mabalin a magatang a kas ken ni suspended Mayor Guo
![](https://img.bomboradyo.com/laoag/2024/06/SEN.-GATCHALIAN-scaled.jpg)
LAOAG CITY – Nasken a maikkan ti pannusa dagiti kas ken ni suspended Bamban Mayor Alice Guo a mangipagarup a mabalin a gatangen ti panagbalin a Pilipino.
Daytoy ti natured nga inbatad ni Senador Sherwin Gatchalian kalpasan ti panangpasingked ti National Bureau of Investigation (NBI) a ti fingerprint ti nasuspende a mayor ket nagpada iti Chinese passport holder a ni Guo Hua Ping a posible a pudno a pakabigbigan ti mayor.
Segun kenkuana, dagiti matching fingerprints a pinasingkedan ti National Bureau of Investigation ket napasingkedan ti nabayagen a suspetsada a maymaysa da Alice Guo ken Guo Hua Ping a maysa a Chinese national.
Mainaig iti daytoy, napaneknekan dagiti agpada a fingerprint ken dokumento nga iggem ti Special Investor Residence Visa a ni Lin Wen Yi ti pudno nga ina ni Guo nga immuna nga imbaga ti mayor a maysa laeng a business partner ti Chinese nga amana.
Kinuna pay ti Senador a dagiti rekord manipud iti Bureau of Immigration a mangipakpakita iti panagbiaheda a sangsangkamaysa ket saan a mailibak nga ebidensia ti panangallilaw.
Innayonna a saan nga ikankano ti pananguyaw ni Guo Hua Ping iti linteg ti Pilipinas ken rumbeng a masungbatan iti kabiitan a panawen.
Nagyaman pay ti Senador iti National Bureau of Investigation, Board of Investment, Presidential Anti-Organized Crime Commission, ken dadduma pay nga ahensia ti gobierno iti panangipaayda iti kasapulan nga impormasion ken panangsuportada iti pananggun-od iti hustisia ken kinapudno.