abyasa
LAOAG CITY – Nagballaag ni Atty. Ana Minelle Maningding, Legal Officer iti National Telecommunication Commission (NTC) Region 1, ti publiko nga agridam kadagiti scammer.
Daytoy ket seknan pay laeng ti agtultuloy nga isyu seknan iti scamming ditoy pagilyan.
Segun ken Maningding, kaaduan kadagiti maaw-awat da report ita a gundaway ket ti pannakapukaw ti selpon ken pannaka-awat ti text messages manipud iti saan nga amammu a number.
No man pay awan unay ti kaso ti na-scam ditoy Rehiyon 1, inpettengna a saan nga agpangdua-dua nga ireport iti opisina da.
Dagiti scam a kangrunaan a mapaspasamak ita a gundaway ket lottery and prizes scams, delivery scams, identity theft scam, romance wenno love scam, job offers ken investment scams, phishing scams, unknown caller scam ken dadduma pay nga scam a mangusar kadagiti nagduduma nga ahensya ti gobierno tapno manggundaway.
Binallaagan na pay ti publiko a saan a gumatang iti sim card a saan a naka-seal, ken siguraduen nga irehistro daytoy.
Kabayatanna, inbatad ni Maningding a mabalin nga agtawag iti hotline number-da (hotline no.1688) wenno mangipatulod ti mensahe iti website da (ntc.gov.ph) no adda dagiti maawat a text message nga agkiddaw ti kuarta wenno dadduma pay nga adda pakainaiganna iti scam ket iti scam.
