abyasa
LAOAG CITY – Kinumpirmaran ni Brgy. Chairman Gerardo Gaoat Bgry. Colo iti ciudad ti Batac a nalmes dagiti dua nga ubbing iti small water impounding system iti nadakamat a lugar.
Nabigbig dagiti dua nga ubbing agkasinsina a da Janice Aganus Bal agtawen ti 14 ken ni Jamell M. Sagun nga agtawen ti 8.
Basar iti impormasion, iti alas-dose ti pangaldaw ket nagutong dagiti dua nga ubbing pakairamanan ti lola ken inna da iti kataltalonan tapnu mangala ti bisokol no sadinno maipagarup a napan nagdigos dagiti dua nga ubbing iti small water impounding system iti nadakamat a lugar.
Gapu iti daytoy, ket insigi a nagkiddaw ti tulong dagiti indibidual nga adda iti kataltalonan a nakakita iti napasamak nga insidente.
Innayon ni Gaoat, dagos a nagresponde dagiti kameng ti Bureau of Fire Protection ken ti Philippine National Police iti ciudad ti Batac ngem naideklarar a pimmusayen gapu iti nabayag pannakaahonda iti small water impounding system.
Mainaig iti daytoy, ket naitaray dagiti biktima iti Mariano Marcos Memorial Hospital and Medical Center ngem saanen a nakalasat dagiti dua nga ubbing.
Nupay kasta, saanen a masinunuo ni Brgy. Chairman Gaoat nu adda pay laeng iti ospital dagiti bangkay ti dua nga ubbing nga agkasinsin.
Kabayatanna, ikarkarigatan ti News Team ti Bombo Radyo Laoag nga alaen ti biang ti Bureau of Fire Protection ken Philippine National Police iti ili ti Batac ti naan-anay nga impormasion iti pannakamalmes dagiti dua nga ubbing.
