Working student nga anak ti mannalon manipud Buguias, maysa kadagiti nagturpos kas cum laude iti BSU

Gapu iti ayatna nga adda ti maka-eskwela iti pamilyada ken gapu iti ayatna a saanen a mapadasan ti rigat iti garden, inkagumaan ni Karylle P. Piaga, 23-anyos nga agturpos iti kolehiyo.

Saan laeng a nagturpos ni Karylle nu di ket nakaawat pay iti award kas cum laude iti Benguet State University idiay La Trinidad, Benguet iti kursona a Bachelor of Science in Development Communication.

Ni Karylle ket anak da Mr. Joseph E. Piaga ken Felisa P. Piaga, agpada a mannalon manipud Cotcot, Bangao, Buguias, Benguet.

Nagturpos daytoy idiay Cotcot – Talabis Elementary School idi 2014 ken nagturpos idiay Bangao National High School kas valedictorian idi 2020.

Iti baet ti kinakurang ti pinansiyal, nagtuloy latta daytoy a nagadal iti kolehiyo babaen iti tulong ti maysa nga organisasyon a nang-sponsor kadagiti dadduma a materyales a kinasapulanna iti panagadalna.

Nagserbi pay ni Karylle kas student assistant ti Benguet State University ken nagserbi kas cashier ken bagger iti maysa a korean store bayat ti panagadalna.

Malaksid iti pinansiyal, inaklonna a nagbalin metlaeng a karit dagiti restriction nga intunda ti COVID-19 pandemic.

Narigatan daytoy iti nagbalin a transition ti edukasyon partikular ti online class a maysa kadagiti rason nu apay a nakaala iti 75 a grado.

Iti baet daytoy, ad-adda a pimmintas ti performance ni Karylle idi naipatungpalen ti face-to-face classes gapu ta namintinarnan ti nangato a grado.

Naragsak nga imbinglayna nga isuna ken dagiti innem a barkadana ket nagturposda kas cum laude.

Impeksa ni Karylle a maysa metlaeng kadagiti nagbalin nga inspirasyonna ket ti kanayon nga ibagbaga dagiti nagannakna nga aggaget  nga agadal  gapu ta daytoy laeng ti maipatawidda kenkuana.

Nangipaay met daytoy ti mensahe kadagiti estudyante nangruna kadagiti padana a nangpadas iti narigat a panagbiag nga ikonsiderada ti financial capabilities dagiti nagannakda nu agala dagitoy iti kurso.

Iti agdama ket planona a sumrek iti government agencies tapno makapagserbi iti komunidad.