Ben Madilynn
Duna nay korte nga niluwat og warrant of arrest batok ni retired Court of Appeals Justice Isaias Dicdican nga wanted sa kasong murder tungod sa pagpatay sa abugadong si Joey Luis Wee sa Cebu City niadtong 2020.
Ang warrant pinetsahan og Mayo 26, 2025 pinirmahan ni Regional Trial Court Branch 14 Presiding Judge Merlo Pasco Bagano, nga nagmando sa pagsikop kang Dicdican, nga dunay nalistang address sa Baseline Center sa Juana Osmeña Street o Guadalupe Heights Village sa Cebu City.
Si Dicdican gikiha og murder ug way gitugot nga piyansa.
“You are hereby commanded to arrest Isaias Perez Dicdican… who has/have been charged before me with the offense of murder… and bring him/her/them forthwith before me to be dealt with according to law,” tipik sa natala sa maong order sa korte.
Ang mga arresting officer gimanduan sa paggamit og body-worn cameras ug sundon ang lagda sa Supreme Court sa pagpatuman sa warrant pagseguro sa proper documentation.
Ang arrest order subay sa Mayo 19 nga mando sa korte nga nagpabor sa motion sa prosecution nga dawaton ang amended information nga ang ngalan ni Dicdican himuong co-conspirator sa pagpatay ni Wee.
Lakip sa gilambigit sa kaso si retired Col. Edwin Forrosuelo Layese ug tulo ka mamumuno.
Si Layese nga anaa na sa kustodiya nipadayag og suporta sa giusab nga reklamo apan nihangyo sa korte nga himuon siyang accomplice o accessory imbes maoy principal suspect. / CAV
Source: Warrant of arrest batok retired Justice Dicdican
