Ben Madilynn
Ang publiko ug netizens napungot sa pagsiaw sa mangunguot karong panahona ug wa silay giila nga dapit basta makakita og kahigayonan o potensiyal nga biktimahon ilang birahan.
Way puangod kadtong unom ka mga babayeng mangunguot nga mibiktima sa usa ka managkutay sa Basilica Minore del Sto. Niño. Ang biktima nga usa ka inahan kuyog sa iyang anak.
Sila tuyo nga miadto sa simbahan sa Sto. Niño niadtong hapon sa Miyerkules, Septiyembre 11, 2024 kay nag-birthday ang bata. Apan kinsa may magtuo nga sa vicinity sa sagrado nga lugar misiaw ang mga kiriwan og kamot.
Asa kaha gibutang ang ilang konsensiya? Naka-ako uroy ang mga suspetsado sa pagpanguot sa managkutay sud sa balay sa Diyos.
Base sa kuha sa CCTV camera sa Basilica malampuson nga nakuha sa mga suspek ang cellular phone sa biktima nga wa makabantay kinsa focus sa iyang pagdagkot ug pag-ampo nga ang iyang gisalib-ay nga bag ang gimaniobra na diay sa mga kawatan.
Komento sa mga netizen gaba nalay ilaha.
Sa habig sa publiko, angayan sab ta nga magbinantayon sa bisan asa nga lugar, mingaw man ug daghang tawo kay kining adunay mga dautang tinguha strike anywhere ni sila, nga desperado nga makuha nila ang iyang tuyo.
Kon hisgutan ang habig sa seguridad bisan tuod naay mga pipila ka lugar nga visible ang mga polis, mas maayo sab nga doblehon pa ang paningkamot sa pagpatunhay sa kahusay ug kalinaw, inabagan sa publiko nga mo-cooperate o ang pakig-alayon aron mapugngan ug masulbad ang bisan unsa nga matang sa krimen.
Manghinaot ta nga kadtong mga mangunguot sa Basilica madakpan sa labing dali nga panahon, ilabi na nga bantang kaayo ang ilang mga dagway sa CCTV gani, ang kapulisan nagkanayon nga nailhan na nila ang maong mga suspek.
