Ben Madilynn
Tungod sa komento nga walay lami ang tuba sa mananggiti nga gikatagay og inom sa biktima, nawalis ang panit sa iyang liog sa dihang giabis sa suspek gamit ang sanggot.
Ang maong insedente nahitabo sa Purok Lumboy, Barangay Cantucong, Lungsod sa Carmen, amihanan sa Sugbo niadtong Martes sa hapon, Agusto 27, 2024.
Ang biktima giila nga si Francisco Sampan, 60, adunay kapuyo, samtang ang suspek nailhan nga si Carlito Villarba Aresco, 56, ulitawo, mananggiti pulos residente sa maong dapit.
Asoy ni Police Captain Jessie Tañola, hepe sa Carmen Police Station sa dihang nahinabi sa Superbalita Cebu nga nag-inom og tuba ang biktima ug suspek sa wala pa mahitabo ang krimen.
Nitumaw ang init nga panaglalis sa duruha nga giingong nangahubog na.
WAY LAMI
Gituohan nga nainit ang ulo sa suspek kay matod si Sampan misaway sa tuba ni Aresco nga matod pa way lami, samtang padayon usab kini og yarok sa maong tuba.
“Ginawong niya og sulti nga wala ma nay lami imong tuba. Nitubag ang suspek nga ‘kon wala ka makauyon palit ngadto sa lain’,” sigon pa ni Tañola, base sa pamahayag sa suspek.
Gani, nagsinukmagay si Sampan ug Aresco og matod pa nahagba ang suspek, dayon mitalikod si Sampan aron unta mopauli.
Apan wa kabantay ang biktima nga mikuha og sanggot ang suspek dayon abis niini sa iyang liog.
Maayong pagkawalis sa panit sa liog ni Sampan ug gidali sa pagtabang sa mga silinganan.
Samtang si Aresco dali nga misibat apan nadakpan ra sab sa kapulisan.
Nasayran nga aduna nay gihambin nga pagdumot ang suspek ngadto sa biktima human nga aduna sad silay panaglalis kaniadto nga giwiktan siya og t-shirt.
Kasong frustrated homicide ang giandam sa kapulisan batok ni Aresco. / GPL
