Utang ti Pilipinas, ngimmato pay iti P15.35T

LAOAG CITY – Inrakurak ti Bureau of Treasury a ngimmato pay ti utang ti Pilipinas iti P15.35T idi Mayo ita a tawen.

Basar iti ahensia, ti pakabuklan nga utang ket ngimmato pay iti P330.39 bilyon wenno katukad ti 2.2 percent iti katapusan ti Abril 2024.

Daytoy ket epekto metten ti panagbaba ti balor ti local currency iti valuation ti foreign-currency denominated debt.

Nakairekord pay ti pagilian ti year-on-year a panagngato ti utang daytoy a dumanon iti 8.4 percent.

Maibasar iti kadagupan a debt stock ti national government, 31.96 percent ti external debt idinto a 68.04 percent ti domestic debt.

Ti domestic debt level iti katapusan ti bulan ti Mayo a P10.44 trilyon ket nangatngato ti 1.3 percent maidasig iti katapusan ti Abril.

Inlawlawag ti Bureau of Treasury ti panagngato ket nagresulta manipud iti P131.66 bilyon a net issuance ti government securities ken P2.68 bilyon nga epekto ti peso depreciation iti foreign-currency denominated domestic debt.

Kabayatanna, ti local debt ti pagilian ket ngimmato ti 8.9 porsiyento idi Mayo.

Ngimmato pay ti external debt ti gobierno iti P4.9 trilyon a nangatngato ti 4.2 a porsiento maidasig iti katapusan idi bulan ti Abril.

Ti external debt met ket ngimmato ti 7.4 a porsiento iti year on year a pangibasaran.