UPDATE: Senior Citizen a naiyanod iti karayan iti Brgy. Isic-Isic iti ili ti Vintar, nasarakanen a bangkay
abyasa
LAOAG CITY – Inbatad ni P/Cpt Jofel Pascual, Chief of Police iti ili ti Vintar nga iti oras ti ala-singko ti malem iti Oktubre 9 ket nakitda ti bangkay ti mapukpukaw ti maysa a Senior Citizen kalpasan a maipagarup a naiyanod iti karayan iti Brgy. Isic-Isic iti ili ti Vintar idi Oktubre 8.
Nabigbig ti ti indibidual a ni Nelson Laureta, agtawen 77, naasawaan ken residente ti Brgy. Isic-Isic iti nasao nga ili.
Segun kenkuana, kabayatan ti panaginanada iti gapu iti panangisayangkatda iti Search and Retrieval Operation, nakitada ti maysa nga ulo nga agtatapaw iti asideg ti maysa a rangtay.
Basar iti imbestigasionda ket mapan koma iyapon ti biktima ti tarakenna a nuang ngem maipagarup a naigalis daytoy a nangitunda ti pannakaiyanodna iti karayan.
Kinunana a nakita ti bangkay ti biktima iti kaadayo nga agarup 3 kilometro manipud iti lugar a nakaiyanudanna agingga iti Sitio Bato iti nadakamat a lugar.
Innayonna nga insardengda ti panangbirok iti biktima iti oras ti alas dose ti rabii idi Oktubre 8 gapu ta napigsa ti tudo ken nalibeg ti danom idinto nga intultuloyda ti nagsarak idi Oktubre 9 no sadinno dimmanon iti 24 nga oras sakbay a nasarakanda ti biktima.
Innayon ni Pascual, ti bangkay ti biktima ket agdama nga adda iti punenaria kalpasan a nabirukan dagiti otoridad.
Agtultuloy met ti panangipalagip ti PNP kadagiti umili a liklikanda ti bumallasiw kadagiti karayan, nangruna no napigsa ti tudo, tapno maliklikan dagiti kastoy nga insidente.
