UPDATE: 3 a suspek, napilaan ti kaso a Murder iti panangpapatay ken ni Kapitan Francisco Bagay Jr. iti Brgy. 5 iti ili ti San Nicolas
abyasa
LAOAG CITY – Kinumpirmaran ni P/Col. Frederick Obar, Provincial Director ti Ilocos Norte Police Provincial Office nga adda ti tallo a suspek no sadinno dua kadagitoy ket John Does ti napilaan ti kaso a Murder gapu iti panangpapatayda ken ni Barangay Chairman Francisco Bagay Jr. iti Brgy. 5 iti ili ti San Nicolas.
Segun kenkuana, agtultuloy ti naiget a panangiwayatda ti imbestigasion iti nasao a kaso no sadinno nga inballaagna a saan nga agsardeng dagiti otoridad agingga a masolbar daytoy ken magun-od ti hustisia.
Inbatadna a saanda nga ikkaten ti anggulo iti imbestigasionda nga adda ti pakainaiganna iti droga, pulitika wenno dati a susik iti napasamak a krimen.
Inlawlawagna a masapol a mapagsungbat dagiti amin nga adda iti likudan ti insidente tapno maipaay ti hustisia iti kabiitan a panawen.
Innayonna nga agtultuloy pay laeng ti naun-uneg a panangtingitingda kadagiti kopya ti Close Circuit Television wenno CCTV camera a mangipakita kadagiti dadduma a pasamak.
Maipalagip a natay ni Kapitan Bagay Jr. kalpasan a napaltu-paltogan iti uneg ti solar-da iti Barangay 5 iti ili ti San Nicolas no sadinno a nagsagaba ti naruay a tama iti bala ti paltog ti agtawen iti 45 a Kapitan ken naitaray iti Black Nazarene Hospital ngem pimmusay kabayatan a maag-agasan.
