Umabot iti P900,000 ti nadadael ti Bagyo Julian iti benneg ti imprastruktura; mapatta-patta a nasurok a P40-M ti dagup a nadadael iti sector ti agrikultura pakairamanan dagiti pagay, segun iti MDRRMO San Nicolas
abyasa
LAOAG CITY – Inbatad ni Ms. Rian Simon, Municipal Disaster Risk Reduction Officer iti ili ti San Nicolas nga umabot iti P900,000 ti nadadael ti Bagyo Julian iti benneg ti imprastruktura idinto a mapatta-patta a nasurok a P40-M ti dagup a nadadael iti sector ti agrikultura pakairamanan dagiti pagay, high value crops ken live stocks.
Innayon ni Simon a posible a ngumato ti danyos dagiti ndadaek gapu ta saan pay a nairaman dagiti report manipud kadagiti nadadael iti benneg ti fisheries.
Nupay kasta, kunana nga adda ti nailatang ti pondo para iti insurance a mangsaklaw kadagiti apit ken taraken dagiti mannalon a naapektaran iti bagyo Julian.
Malaksid iti daytoy, nagesesen ti danom kadagiti apektado a lugar iti ili ti San Nicolas, ken adda dagiti nagbakuit a nagsublin iti pagtaenganda idinto, nga awan ti nairekord a pannakapukaw ti biag iti nadakamat a kalamidad.
Kabayatanna, segun ken ni Simon, maysa kadagiti rason ti panaglayus iti Barangay 16 iti nadakamat nga ili ket ti agtultuloy a panagtudo, kagiddan ti pannakadadael ti slope protection iti Barangay San Marcos.
