Tulo ka ‘durugista’ sikop sa buy-bust

TULO ka nga gidudahang tigpayuhot sa ilegal nga drugas ang nangadakpan sa gilusad nga managlahi nga buy-bust sa Waterfront Police Station 3 sa Cebu City Police Office (CCPO) sa Miyerkules sa gabii, Hunyo 11, 2025 sa Barangay Tejero sa Siyudad sa Sugbo.

Labing uwahing nadakpan alas 11:55 sa gabii sa Sityo Back Blessed, Barangay Tejero giila nga si alyas Eton, 39, E-bike driver nga taga Garfield Street, Barangay Suba.

Nakuha sa mga operatiba sa Waterfront ang mga pinakete sa gituohang shabu nga motimbang sa 5.10 gramos nga dunay standard drug price nga P34,680.

Laing drug personality ang ilang nadakpan alas 10 sa gabii sa Sityo Daclan sa maong barangay nga giila nga si alyas Lando, 53, taga Pasil.

Nakuha gikan kaniya ang unom ka pakete sa gituohang shabu nga motimbang sa 5.18 gramos nga dunay balor nga P35,224.

Lakip sa nadakpan ang 52 anyos nga laborer nga nabutang sa listahan sa PNP nga nagpayuhot sa ilegal nga drugas didto sa Sityo Locban, Barangay Tejero alas 8:55 sa gabii.

Ang nadakpan giila nga si alyas Esyot nga taga Barangay Suba nga nasakmitan og unom ka pakete nga gituohang shabu nga mokantidad sa P36,720.

Ang mga nakuhang ebedensya giduso na sa PNP Regional Forensic Unit 7 alang sa himuon nga chemical analysis samtang giandam na usab ang kasong kalapasan sa Section 5 ug 11, Article II, Republic Act 9165 batok sa mga suspek. / AYB