Ben Madilynn
Namatay diha-diha dayon ang usa ka tricycle driver human pusila alas 10:20 sa gabii, Biyernes, Mayo 30, 2025 sa Sitio Caimito, Barangay Langtad, lungsod sa Argao.
Ang biktima nga nakaangkon og mga samad pinusilan sa lawas mao si Retchelo Templa, 33, molupyo sa maong lugar.
Nailhan hinuon sa mga saksi ang naghimo sa krimen nga mao si Kim Ruiz Artiaga alyas Boy, taga Barangay Talaytay lungsod sa Argao.
Matud ni Police Major Janus Giangan, ang hepe sa Argao Police Station, nga nag-inom ang biktima ug ang suspek tungod kay birthday sa inahan sa naulahi sa Barangay Talaytay.
Apan sa dihang nangahubog na, nasingkahan sa biktima ang suspek nga miresulta sa ilang panaglalis ug pagsinumbagay.
Sa dihang mipauli na ang biktima sa Sitio Caimito, gisundan kini sa suspek ug sa gawas sa balay sa igsuon niini didto siya gipusil.
Dali nga miresponde ang kapulisan sa Argao human madawat ang alarma sa pagpamusil.
Sa dihang nakuha nila ang pangalan sa suspek milusad dayon sila og hot pursuit operation sa pakig-alayon sa mga kabanay sa suspek.
Tuod man pagka alas 12:10 sa hapon, Sabado, Mayo 31, 2025 ilang nadakpan ang suspek.
Giandam na sa kapulisan ang kasong murder batok ni Artiaga. / AYB
Source: Tricycle driver gipusil-patay sa kainom nga iyang
