Ben Madilynn
PALYADO nga makina maoy gilantaw nga hinungdan sa pagkabalintong sa trak alas 1:20 sa hapon, Martes, Oktubre 1, 2024, sa Arakan, probinsiya sa Cotabato.
Ang hitabo nikalas sa kinabuhi ni Jimmy Linco, panday nga nagpuyo sa Barangay Mabuhay, President Roxas sa maong probinsiya samtang niangol sa lain pang lima nga sila John Lester Gentallan, 35-anyos, laborer, taga President Roxas; Marvin Suminguit Aborque, 26-anyos, backhoe operator; Noel Blancaber, 52-anyos, foreman; ug Aldrin Gentalla, 28-anyos, laborer; Wenefred Dacanay, drayber, nga nagpuyo sa Kidapawan City.
Sumala kang Cotabato Provincial Police Office Director Colonel Gilberto Tuzon nga sakay ang mga biktima sa boom truck nga dunay plaka nga NDH-3373 ug gimaneho ni Dacanay paingon sa Barangay Salansang, Arakan sa nahisgutang probinsiya.
Apan pag-abot niini sa tungason nga kalsada sa Sitio Napanlahan, Barangay Poblacion, Arakan, nikambyo og “gear” si Dacanay sa trak apan nipalya kini. Hinungdan nga niatras paubos ang boom truck ug diretso pagkahulog sa lawom nga parte kilid sa kalsada.
Patay gilayon si Linco nga naipit sa boom truck samtang ang lima nga naangol gidala dayon sa balay tambalanan.
Gipahimangnoan sa kapulisan ang mga drayber nga seguraduhon nga anaa sa maayong kondisyon ang ilang sakyanan sa dili pa mobiyahe alang sa ilang kaluwasan ug sa mga pasahero. (EEF)
