Ben Madilynn
Sa pagseguro sa structural integrity sa viaduct sa South Road Properties (SRP) ug sa Cebu-Cordova Link Expressway (CCLEX), usa ka weighbridge station facility sa Cebu South Coastal Road (CSCR) sa Dakbayan sa Sugbo gisubhan niadtong Biyernes.
Si Cebu–Cordova Link Expressway Corporation (CCLEC) President ug General Manager Allan Alfon nitug-an sa mga tigbalita niadtong Biyernes, Septiyenbre 13, 2024.
Kauban ni Alfon sila si Acting Cebu City Mayor Raymond Alvin Garcia, Cebu City Councilors Rey Gealon ug mga opisyal sa Department of Public Works and Highways, nga maoy nangulo sa ceremonial groundbreaking sa proyekto nga gipahigayon sa expanded lane sa CSCR.
Matod ni Alfon nga ang pasilidad makapahapsay usab sa kahuot sa trapiko sa viaduct tungod kay makatabang kini sa pagpugong sa mga overloaded nga mga trak ug mga trailer nga mabara o maguba samtang diha sa CSCR nga maoy hinungdan sa grabeng trapiko sa maong dapit.
Iyang gipasabot nga ang pasilidad estratehikong nahimutang atubangan sa viaduct ug CCLEX on-ramp alang sa northbound nga mga sakyanan.
Sa higayon nga magamit na, ang estasyon sa timbangan adunay usa ka booth nga magdeterminar sa gibug-aton sa mga trak ug mga trailer, diin ang mga overloaded nga trak ug mga trailer dili tugotan nga moagi sa viaduct ug CCLEX bridge. / EHP
