Thunder mosuway pagposte’g 2-0 nga bintaha

Mosuway pagposte og 2-0 nga bintaha ang host Oklahoma City Thunder sa ilang pagpakigsangka og balik sa Minnesota Timberwolves sa Game 2 sa Western Conference finals series sa National Basketball Association (NBA) karong Biyernes sa alas 830 sa buntag, Mayo 23, 2025 (PH time).

Sa Game 1 ning best-of-seven series, gipakita sa Thunder nganong nahimo silang No. 1 overall sa regular season pinaagi sa paglampornas sa Timberwolves, 114-88.

Nagkanayon ang usa sa mga pambato sa Timberwolves nga si Anthony Edwards, kinahanglan nilang masulbad ang agresibo ug wala’y puas nga depensa sa batan-ong puwersa sa Thunder aron aduna sila’y purohan nga makabawos.

Gipasalig ni Edwards nga kinahanglan niyang mas moagresibo nga wala niya nahimo sa Game 1 diin igo lang siyang nakamugna og 18 puntos, nga layo ra sa kasagaran niyang nahimo.

“Play without the ball a little more, get a little more cardio in. Should be good,” matod ni Edwards nga napatik sa AP News.

Matod ni Thunder coach Mark Daigneault nga gipangandaman nila ang adjustments nga himuon sa Timberwolves. / Gikan sa wires