Teves ipa-deport sa Timor-Leste

GIMANDO sa gobiyerno sa Timor-Leste nga i-deport si Negros Oriental Representative Arnolfo Teves Jr., human gidakop sa Dili City.

Sa usa ka pahayag, ang gobiyerno sa Timor-Leste nag-ingon nga ang presensya ni Teves sa ilang nasod adunay peligro sa kahusay sa publiko ug nasudnon nga seguridad ug nagrepresentar sa usa ka seryoso ug dili madawat nga kahimtang, sanglit ang Pilipinas ug Timor-Leste pulos mga miyembro sa Association of Southeast Asian Nations (Asean).

“His extended stay in Timor-Leste for over two years poses a disruptive factor in bilateral relations between the two States and establishes a serious precedent with potential implications for internal security. The perception that Timor-Leste might be viewed as a refuge for individuals fleeing international justice undermines the integrity of our borders and our shared efforts to combat transnational crime,” matod sa gobiyerno sa Timor Leste.

“The Government hereby informs that Arnolfo Teves Jr. will be deported from Timor-Leste by administrative decision of the Ministry of the Interior, as he is in the country without a valid visa, lacking legal authorisation to remain, and holding a passport that the Government of the Philippines has cancelled,” dugang niini.

Ang mando epektibo dayon.

Si Teves nag-atubang og kasong murder ug frustrated murder kalabot sa pagpatay ni kanhi Negros Oriental gobernador Roel Degamo ug uban pang mga inosenteng sibilyan niadtong Marso 4, 2023.

Nag-atubang sab siya og kasong murder kalabot sa pagpatay sa tulo ka mga indibiduwal sa probinsiya niadtong 2019, lakip si Miguel Dungog, kanhi board member sa Negros Oriental.

Ang kanhi magbabalaod hugot nga nihimakak sa kalambigitan sa maong mga pagpamatay.

Samtang, gihangop sa Department of Justice (DOJ) ang desisyon sa gobiyerno sa Timor Leste sa administratibong deportasyon kang Teves.

Sa usa ka pahayag, ang ahensya nag-ingon nga gilihok na ang hiniusang grupo nga gilangkuban sa mga representante gikan sa DOJ, Bureau of Immigration (BI), ug National Bureau of Investigation (NBI) aron makig-alayon sa mga awtoridad sa Timorese ug motabang sa luwas ug legal nga pagpauli ni Teves balik sa Pilipinas.

“The DOJ lauds this act of regional responsibility and reiterates its appreciation to the Government of Timor-Leste for its commitment to justice, international rule of law, and regional stability,” matod sa DOJ.

“As we await the arrival of Mr. Teves, the Philippine Government assures the public and the international community that due process will be strictly observed, and that justice will be pursued without fear or favor,” dugang niini. / TPM / SunStar Philippines