Taylor Lautner reacts to “What hafen, Vella” trend

Nakarating na sa Hollywood actor na si Taylor Lautner ang viral dialogue na “What hafen, Vella” na pinasikat ni Cristopher Diwata.

Si Cristopher ay contestant ng “Kalokalike Face 2,” isang segment noon ng noontime show na It’s Showtime.

Taong 2013 nang sumali si Cristopher sa popular segment ng ABS-CBN noontime show.

Ginaya niya si Jacob Black, ang karakter ni Taylor sa sikat na film series na Twilight.

Nag-viral si Cristopher dahil sa unique accent na pagkaka-deliver niya ng linya ni Jacob: “What hafen, Vella, why are you crying again? I know, vamfire right? Vampire will feyt me. I trusted you to protect Vella, but you did not! I will sure you die, Edward. I will sure you die. From now on, she’s mine.”

Bagamat ilang taon na ang nakakaraan, muling nag-trending ang video na ito ni Christopher sa TikTok at iba’t ibang social media platform.

Maging ang mga kilalang personalidad sa showbiz ay dinub na rin ito.

Kabilang sa kanila sina Bela Padilla, Piolo at Iñigo Pascual, BINI Maloi, Aiah, at Mikha, KZ Tandingan, TJ Monterde, Kyline Alcantara, Michael Sager, at Ryza Cenon.

OG Taylor Lautner notices PH’s Taylor Lautner

Dahil bukambibig ngayon ng marami ang dialogue na “What hafen, Vella,” hindi ito nakaligtas kay Taylor.

Nitong Lunes, June 2, 2025, nag-post ng video si TikTok si Taylor, kasama ang asawang si Taylor Dome.

Sa comments section ng post na ito ni Taylor ay isang Filipino netizen ang nag-comment ng, “Bro noticing everything except the What hafen, Vella trend.”

Napansin ito ni Taylor at agad siyang nag-reply: “Yup, but it’s not [your] fault, it’s mine.”

Dahil sa pagre-reply na ito ni Taylor, maraming netizens na rin ang umengganyo sa kanyang gawin ito at i-dub.

Komento ng isang netizen, “Please do the what hafen, Vella please.”

Saad pa ng isa (published as is), “You will literally destroy Philippines’ internet if you do that what hafen, Vella. You wil make it to the news.”

Dagdag pa ng isa (published as is), “C’mon bro let’s do that WHAT HAFEN VELL, it’s time! People will go crazy over it for good reasons.”

CrisTOPHER Diwata becomes an internet sensation

Sa eksklusibong panayam ng PEP.ph (Philippine Entertainment Portal) kay Cristopher Diwata noong May 15, sinabi nitong malaki ang kanyang pasasalamat sa pagba-viral ng It’s Showtime performance niya.

Nagbukas daw ito ng maraming oportunidad sa kanya.

Dumagsa raw ang offers ni Cristopher for collabs and commercials with companies—kabilang ang fast-food chain, major online shopping, coffee shop, electric appliance, at cargo services.

Aniya: “Malaking pagbabago kasi after one week pa lang po, nag-viral po yung video, may mga offers na magkaroon ng endorsements. Malaking tulong po para sa akin.”