Ben Madilynn
Duna nay identity ang kapulisan sa Badian sa mamumuno nga mipusil-patay sa barangay tanod sa Barangay Talayong, alas 6:37 sa gabii, Dominggo, Septiyembre 15, 2024, sa Sitio Upper sa naasoy nga barangay sa lungsod sa Badian.
Si Francisco Millan Vertucio, 53, biyudo nagpuyo sa nahisgutang lugar patay human gipusil sa duha ka mga armado’ng lalake nga sakay sa motorsiklo.
Kini maoy gibutyag ni Police Captain Jerwin Mark Battung, hepe sa Badian Police Station nga nahinabi sa Superbalita Cebu.
Ang ilang saksi nga gihuptan nakakita sa suspek kinsa wala magtabon sa iyang nawong. Samtang ang drayber sa motorsiklo wala pa mailhi sanglit ngitngit ang palibot sa dapit sa krimen.
Ang motibo personal grudge sanglit mibahad ang suspek tungod sa pagtultol sa biktima sa usa ka ahente sa motorsiklo nga giutangan sa suspek.
Matod pa, nabawi ang motorsiklo nga giutang sa suspek hinungan nga nabawi ang motorsiklo. Tungod niini, nibahad ang suspek nga iyang balikan ang biktima.
Atol ning pagsuwat, nagpadayon ang ilang hot pursuit operation batok sa mga suspek./ GPL/DVG
