Suspek pagtipi sa magtiayon todas

NAPATAY sa kapulisan ang suspek sa nagtipi sa magtiayon human giingong nisukol alas 10:00 sa buntag, Sabado, Mayo 17, 2025, sa Matalam, probinsiya sa Cotabato.

Giila ang suspek nga si alyas Alex kinsa molupyo sa Purok Waling-Waling, Barangay Poblacion, Matalam.

Gibutyag ni Cotabato Police Provincial Office (CPPO) Director, Police Colonel Gilberto Tuzon, nga gironda sa kapulisan sa Matalam Municipal Police Station ang gipuy-an sa suspek apan misukol kini ug napatay sa raiding team.

Narekober gikan sa posisyon ni alyas Alex ang iyang armas ug mga buhing bala.

Si alyas Alex maoy gitumbok nga nipusil sa magtiayon nga Eliser “Esing” Sugaste, magtutudlo sa Matalam National High School ug iyang asawa nga si Lalaine Tejada Valdez Sugaste.

Sumala pa nga magsira na unta sa printing and computer shop ang magtiayon sa diha nga nahiabot ang suspek.

Gitionan og armas ang mga biktima ug gikuha ang ilang CRF 150 nga motorsiklo ug dayong nisibat.

Gitudlo sa mga testigo ang suspek ug nakakuha sab og hulagway sa closed-circuit television (CCTV) camera ang awtoridad hinungdan nga nilampos ang operasyon. (Edgar E. Fuerzas)