Suspek pagpatay sa lalaking gilubong sa farm giukoy na

LAWOM nga hinungdan sa personal nga bangi ang padayon karon nga ginasubay sa mga pulis sa pagpatay sa usa ka 41-anyos nga lalaki ug gilubong sa usa ka farm lot sa Sitio Davao Gulf, Barangay Tamugan, Marilog District, Davao City.

Sa report sa Davao City Police Office (DCPO) ang Marilog Police Station 12 mihimo og lawom nga imbestigasyon aron madakpan ang suspek nga usa ka alyas Mark 20-anyos ug residente sa Sitio Pegalungan, Brgy. Tamugan, Marilog District.

Usa ka hot pursuit operation karon ang gihimo sa Marilog PNP sanglit ila nang nailhan ang suspek sa pagpatay sa biktima nga si Roy Amolong, 41-anyos, residente sa Sitio Mapawa, Davao De Oro.

Alas 9:20 sa buntag niadtong Sabado, Hulyo 6, 2024, nangalisngaw ang baho ug dunay daghang langaw sa bag-ong gikabkab nga yuta sa usa ka farm lot nga gipanag-iyahan sa mga Celes.

Natahap ang pipila ka residente ug gipahigayon ang pagkalot, dihang usa ka patay’ng lawas sa lalaki ang napalgan nga nakasuot og itom nga t-shirt ug naka-boxer shorts kini.

Dunay daghang dinunggaban ang biktima sa kalawasan nga maoy hinungdan sa kamatayon niini.

Subay sa gisaysay sa tulo ka mga testigo nga nahinabi sa mga pulis, personal grudge ang motibo sa krimen diin niadtong Hulyo 4, 2024 mga alas 11 sa gabii, ang suspek giila nila nga maoy posibleng responsable sa krimen.

Pasalig sa Marilog PNP nga sa hinanaling panahon ilang madakpan ang suspek sanglit padayon karon ang ilang gihimo nga hot pursuit operation. (Jeepy P. Compio)