Ben Madilynn
Nagpaalim sa iyang nahiaguma’ng samad ug bun-og ang 49 anyos nga mag-uuma human gitabangan og kulata ug gitigbas sa iya ra sab nga mga silingan.
Ang insidente nahitabo sa Barangay Tigbao, Lungsod sa Badian, Sugbo, sa alas 6:45 sa gabii, Septiyembre 19, 2024.
Ang biktima gitago sa pangala’ng Joel, ulitawo ug residente sa maong barangay.
Base sa pasiunang imbestigasyon sa kapulisan sa Badian nga si Joel miadto og usa ka tindahan kay adunay paliton, naatol nga anaa sa maong lugar ang duha ka managsuong suspek nga sila si Reagan ug Ronald.
Nitumaw ang init nga panaglalis tali sa duruha ka habig sa dihang gipangitaan sa sundang si Joel sa mga suspek.
Gikatahong gitabangan og kulata ang biktima sa managsuon ug wa pa matagbaw gitigbas pa kini sa makadaghang higayon.
Gidali sa pagdala si Joel sa iyang mga kaliwat sa tambalanan nga naangol human sa hitabo.
Samtang si Ronald ang nadakpan ug nakuhaan sa hinagiban samtang si Reagan ang nakaeskapo ug gipangita sa kapulisan, kasong frustrated murder ang gisang-at batok sa managsuon. / DVG
