Ben Madilynn
Haskang kapoya! Dili gyod sayon mag-maestra. Tibuok adlaw nga sigeng tindog ug yawyaw, unya pag-uli sa balay hangtod tungang gabii pa og dumog sa mga basahunon ug sulatunon aron makaandam sa klase na pod pagkaugma. Matod pa sa iyang ig-agaw, “Pastilan, Dayday, morag wala na gyod tingali kay paglaom nga magka-lablayp ba. Ingon sa mao na man imong giminyoan kanang imong trabaho isip magtutudlo.”
Sama sa naandan, naabtan na pod siyag tungang gabii sa pag-tsek sa mga papel sa mga bata ug paghikay sa lesson plan para sa sunod nga mga klase. “Tungod ug alang sa kaugmaon sa nasod, padayon ug walay kapoy-kapoy!” pagdasig niya sa kaugalingon. Apan gidaog ra gyod gihapon siya sa kakapoy.
Nakatagpilaw siya nga naghukdong ibabaw sa nagkatag nga mga papel sa lamesa. Apan ingon sa gialimungawan siya nga nakamata dihang ingon sa duna siyay namatikdan.
Ngiob ang palibot. Napalong diay ang kuryente, brownout. Nabatyagan niya ang usa ka porma nga miamag taliwala sa kangiob. Pamayhon sa usa ka babaye nga nagsul-ob og sapot nga puti ug ingon sa naglutaw sa hangin – usa ka “white lady”. Dili niya maaninaw ang nawong sa maong linalang, apan iyang nabatyagan ug naseguro nga ang nawong niini walay lain kon dili ang iya mismong kaugalingong dagway. Ambot giunsa, pero nasayod siya nga siya mao ang “white lady” nga iyang namatikdan.
Nianang pagkabuntag, napalgan siya sa iyang ig-agaw nga wala nay kinabuhi dinha sa lamesa nga maoy iyang naandang trabahuanan kon naa siya sa ilang balay. Ibabaw sa usa ka papel dinha sa lamesa mao ang iyang paboritong fountain pen – usa ka kolor bulawan nga Pilot Metro — nga kinuhaan og taklob. Sa papel mismo, duna siyay giwiriswiris nga usa ka balak. Apan wala kini mahuman. Ang taytol kay ‘ANG MAESTRA.’
(KATAPUSAN)
