Sugilanon: Katumanan sa iyang gugma

NAGKITA ang managhigalang si James ug Arnold sa usa ka sikat nga kan-anan sa Siyudad sa Sugbo. Kauban ni Arnold ang iyang asawa ug usa ka higalang babaye nga si Joan

“Bay Arnold, kumusta?” pangutana ni James.

“Okay ra, Bay. Dugay na ta wa magkita… ug tuod, Bay, akong asawa si Nilda ug ang iyang higala nga si Joan.

Pwerting tutok ni James kang Joan. Nadani gyud dayon ang iyang pagbati ngadto kang Joan. Matahom si Joan. Sama sa usa ka maanyag nga aktres ang hitsura niini. Sa laktod, makabibihag si Joan.

Pagkagabii wala mahimutang si James, sige siya og hunahuna ni Joan. Misantop sa iyang hunahuna nga mangayo og cell number ni Joan busa iyang gitawgan si Arnold.

“Bii diha, Bay Arnold, puwedi mangayo kog pabor?”

“O, Bay James, unsa man?”

“Puwedi mangayo kog cell number ni Joan kay makighigala ko niya.”

“O, Bay.

Ug gihatagan ni Arnold si James sa number ni Joan. Giteksan dayon ni James si Joan nga makighigala siya ug mi-reply sad si Joan. Ug nagsige na silag teksanay. Hangtod nga miabot ang adlaw nga nagkasabot sila nga magkita kay mosakay na og balik sa barko si James. Usa ka seaman si James.

Nag-abot sila sa usa ka mahalon nga restawran. Ug didto wala palabya ni James ang higayon. Mipadayag siya sa iyang gibati ngadto kang Joan.

“Joan, naa unta koy isulti nimo.”

“Unsa man na, James?”

“Sa una pa lang natong panagkita mipitik dayon ang akong kasingkasing, nagpasabot nga nahigugma ko nimo.”

“Sori, James. Sa pagkakaron dili pa nako madawat ang imong gugma.”

“Okay. Andam kong magpaabot”.

Misakay naog balik sa barko si James. Sige lang gihapon silag teksanay. Suguon ni James ang iyang manghod nga papaliton og cake, flowers ug chocolate unya ipahatod ngadto kang Joan.

Sa pag-adto sa manghod ni James sa balay nilang Joan, ang miatubang ang mama ni Joan nga pwerting isoga’g nawong. Gidawat man tuod sa mama ni Joan ang regalo pero ang nawong niini dili ma-drawing. Apan bisan pa sa gipakitang batasan sa mama ni Joan wala mausab ang gugma ug tinguha ni James nga maangkon gayud ang kasingkasing ni Joan.

Gidoble ni James ang iyang pagkugi ug paningkamot. Gihimo niyang lamdaman ang kinaiya sa inahan ni Joan. Nagtigom siya ug igong ikagasto sa kasal unya nila ni Joan. Dako ang iyang paglaom nga dawaton ra unya ni Joan ang iyang gugma ug nga mopabor na kaniya ang inahan sa babaye.

Ug tuod man, sa pagpangalarag sa mga dahon sa panahon nanaog na sad si James sa barko ug nagkita na sab sila si Joan. Ug didto gidawat na ni Joan ang gugma ni James. Malipayon kaayo si James kay naangkon na man gyud niya ang gugma ni Joan.

Nanglabay ang mga tuig nagkasabot sila nga magpakasal na inig balik na sab niya og kanaog sa barko. Ug sa pagkanaog na sab ni James sa barko, nagpakasal sila kaniadtong Abril 21, 2025. Nagpuyo silang malinawon ug hupong sa pagmahal sa usag-usa. 

(KATAPUSAN)