Sugbo kuwang og 3K ka classrooms

KAPIN sa 3,000 ka mga classroom ug pasilidad ang kuwang sa tibuok Lalawigan sa Sugbo sa pagbukas unya sa klase.

Gibutyag ni Department of Education (DepEd) 7 Director Dr. Salustiano Jimenez ang maong kakuwang atol sa usa ka news forum kaniadtong Martes, Hunyo 3, 2025.

Matod ni Jimenez nga ang Probinsiya sa Sugbo maoy adunay labing taas nga kakuwang sa rehiyon nga nanginahanglan og kapin sa 3,000 ka lawak-saringan.

Iyang gitumbok nga hinungdan sa kakuwang mao ang kalangan pagtukod gumikan sa nangaging natural nga kalamidad, ilabi na ang bagyong Odette ug ang wala pag-ayo sa kasamtangang guba nga mga classroom.

Niingon si Jimenez nga ang COVID-19 pandemic nakapalangan sab sa pundo alang sa pagtukod sa bag-ong mga building. 

Nakig-alayon si Jimenez kang Education Secretary Sonny Angara nga nisaad nga paspasan  ang pagsulbad sa problema. 

Gihatagan og prayoridad ni Angara ang pag-ayo sa daan ug guba nga mga lawak-saringan.

Sa pagpangandam alang sa school year, gibisita ni Jimenez ang nagkalainlaing division offices. 

Nakigtagbo siya sa mga local government units (LGUs) ug uban pang mga stakeholders.

Atol niining mga tigom, iyang gilatid ang gidak-on sa problema sa imprastraktura ug giawhag kining mga organisasyon sa pagtinabangay alang sa dinalian ug dugay nga mga solusyon.

Ang kakulangan sa lawak-saringan niresulta sa pipila ka mga klase ug mga estudyante nga nakasinati og lainlaing schedule sa oras, bisan sa sayo sa buntag o sa hapon hangtod sa gabii.

Niingon si Jimenez nga ang mga pagpangandam nagpadayon na samtang ang 2025 school year gikatakdang mag-sugod karong Hunyo 16.

Ang paglusad sa Brigada Eskwela gikatakda karong Lunes, Hunyo 9. Ang training alang sa bag-ong Matatag curriculum nag-sugod usa ka semana na ang nilabay.

Niingon si Jimenez nga 56 ka pampublikong ug pribadong eskwelahan sa Central Visayas, lakip ang Negros Oriental ug Siquijor, ang magsugod sa pilot implementation sa giusab nga senior high school (SHS) curriculum.

Ang bag-ong SHS curriculum ipatuman sa pinili nga mga eskwelahan sa tibuok rehiyon sugod sa School Year 2025–2026, sugod Hunyo 16, 2025, hangtod Marso 31, 2026.

Ang hingpit nga pagpatuman sa tibuok nasod gilauman sa mosunod nga school year. / EHP