Sud sa 2 ka oras nabawi ang motor, suspek nadakpan

GIDAKOP ang 20-anyos nga ulitawo human nakuha sa iyahang posisyon ang gikawat nga motor niadtong Hunyo 10, 2025 sa Barangay Poblacion, Lungsod sa Dalaguete. 

Ang suspek giila sa alyas nga Jojo, walay trabaho ug nagpuyo ra sa usa ka barangay sa naasoyng lungsod. 

Base sa imbestigasyon sa kapulisan sa Dalaguete,  personal nga ni-report ang tag-iya sa motor nga si Shan Reed Cena, 21, usa ka bagger sa department store, dunay live-in partner ug lumulupyo sa Barangay Banhigan, Dalaguete Cebu nga nawala ang iyahang motorsiklo.

Iyang gidudahan nga gikawat human niya gi-parking sa Dalaguete Municipal Hall. 

Nahitabo ang pagpangawat alas 6:30 sa gabii,Hunyo 10 ug gisuwayan niya og pangita apan pakyas sa pag- locate niini. 

Tungod niini, alas 7:00 pasado sa gabii sa susamang adlaw ni-report ang biktima sa kapulisan ug sa tuyo nga mapadali ang pagpangita sa iyang motor, gi-post niya kini sa iyang social media account. 

Mga alas 8:00 sa gabii, nagpahibawo ang biktima sa kapulisan nga nakit-an niya sa Lungsod sa Alcoy ang iyang motor. 

Nipahigayon og hot pursuit ang PNP sa Alcoy ug ilang naaktuhan ang suspek nga naa sa iyang posisyon ang motor sa biktima.

Gitanggong sa Dalaguete Police Station ang suspek. / JDG