Ben Madilynn
Pagsulod sa Septiyembre, misugod na usab sa paghingusog ang Police Regional Office (PRO) 7 sa ilang kampanya batok krimen nga niresulta sa pagka sikop sa kapin usa ka libo ka mga tawo diin labing daghan niini nakalapas sa lainlaing lokal nga ordinansa sa matag lungsod ug siyudad.
Gikan sa Septiyembre 1-2, 2024 ang kapulisan sa Central Visayas nakasakmit og 458.85 ka gramos sa gituohang shabu nga dunay standard drug price nga P3.1 milyones ug pagkasikop sa 35 ka mga drug personalities.
Gawas niini, nakasikop usab ang PNP og 39 ka mga sugarol atol sa 20 ka operasyon nga gihimo sa kapulisan batok illegal nga sugal diin naimbargo nila ang P3,000 nga kwarta sa sugal.
Sa ilang kampanya batok loose firearms ang PRO-7 naka sakmit og 39 ka armas nga walay lisensya ug lima ka explosives atol sa 41 ka operasyon.
Wala lung-i sa kapulisan ang pagpangita sa mga wanted persons diin naka sikop silag 17 ka tawo nga dunay mga pending warrant of arrest sa lainlaing kaso duha ani nabutang sa most wanted .
Samtang nakatigom ang gobyerno og P477,840 isip multa sa 946 ka mga tawo nga nakalapas sa nagkalainlaing ordinansa sa matag lungsod ug syudad sa Central Visayas.
Nasayran nga panahon sa ‘ber months’ o Septiyembre ngadto sa Disyembre namatikdan sa kasinatian sa kapulisan nga dunay pagsiaw sa kriminalidad sama sa kawat, tulis, pagpanglabni ug uban pa labi na sa sentro sa dakbayan.
Kini usab ang panahon nga tingdawat og mga bonus sa mga dunay trabaho. / AYB
