Ben Madilynn
Giila nga mamuso ang suspek nga alyas Popeye, 45 ang nasikop sa dihang kalit nga misulod sa balay sa 20 anyos nga dalaga sa Sityo White Road, Barangay Inayawan, Dakbayan sa Sugbo, Miyerkules sa buntag, Agusto 28, 2024.
Base sa inisyal nga imbestigasyon sa Inayawan Police Station nga ang biktima nga usa ka tinun-an ug silingan ra sab sa suspek ang natulog sa ilang balay niadtong higayona.
Nakugang ang biktima sa dihang diha na sa sud si Popeye hinungdan nga nagpaninggit siya og tabang.
Ang amahan sa suspek ang dali nga nangayo og assistance sa barangay tanod aron sa pagdakop ni Popeye kinsa giila nga badlungon sa ilang lugar.
Nasayran nga naibog si Popeye sa maong biktima gani gisigehan kini niya og sunodsunod ug gipasanginlan sab nga magpunay og panglili ngadto sa dalaga.
Apan sa pakighinabi sa suspek nga gibalhog sa bilanggoan nangangkon kini nga iyang asawa ang biktima kinsa nakamata lang gikan sa iyang pagkatug sa dihang iyang gipukaw.
Si Si Police Master Sgt. Alfredo Macabudbud, Jr., imbestigador sa Inayawan Police Station mitug-an sa dihang nahinabi sa Superbalita Cebu nga adunay suliran sa pangisip ang maong suspek resulta sa iyang pagkagumon sa ginadiling drugas.
“Badlungona ani niya sa ilaha tungod lagi sa bisyo. Maghimohimo siya og istorya magkatawa nalang ang mga silingan,” saysay ni PMS Macabudbud.
Samtang ang pamilya ni Popeye nagplano sa pagpa-rehab niya.
Gitakda karong adlawa mag-abot sa barangay hall ang suspek ug ang biktima. / GPL
