Sta. Catalina Police Station, nagballaag kadagiti nagannak kasaruno ti dandani a pannakalmes ti maysa a menor de edad
Mario Bautista
Nagballaag ni Police Executive Master Sergeant Florence Rapacon kadagiti nagannak a bantayanda ti pap-papanan dagiti annakda gapu iti dandani a pannakalmes ti maysa a menor de edad idiay Barangay Paratong, Sta. Catalina.
Ti menor de edad ket agtawen iti sangapulo ket uppat a lalaki, grade 9 student, taga-Barangay Zone 2, Bantay.
Iti pannaki-uman ti Bombo Radyo Vigan ken ni Rapacon, nasken nga amoen ti papanan dagiti annak ken siasino ti kaduada ngem no madi ti sasaaden ti panawen ket saan a palubosan a mapan iti kabaybayan.
Innayonna nga adu kadagiti ubbing ti saan nga agpakpakada kadagiti nagannakda ta tunggal pay weekend ket adu dagiti mapan agdidigos iti kabaybayan ti Sta. Catalina.
Maipalagip a ti menor de edad ket naglalangoyda kadagiti gagayyemna iti kabaybayan idin ta napan iti adalem a paset ket saanen a nakasubli a mapan iti naab-ababaw.
Naitaray iti ospital para iti naan-anay a pannakatamingna ket natalged metten ita ti kasasaadna.
