Sr. Citizen gipareglahan sa silingan, gidunggab

Gibalhog sa Mabolo Police Station ang usa 59 anyos nga lalaki human giingong kalit nga nanunggab sa iyang silingan nga senior citizen sa Sitio Zapatera, Barangay Luz, Dakbayan sa Sugbo niadtong Hunyo 7, 2025. 

Ang nasikop giila lang nga si alyas “Juan”, minyo, walay trabaho ug nagpuyo sa Ramos Extention, Barangay Lahug, Dakbayan sa Sugbo. 

Samtang ang biktima nga 61 anyos nailhan lang sa alyas nga “Fredo.” 

Sa inisyal nga pakisusi sa Mabolo Police Station, gikataho nga kalit lang nag-init ang ulo sa suspek nga niresulta sa pagpanunggab sa biktima gamit ang mahait nga butang ug nasamdan sa wala nga bahin sa  bukton. 

Daling nakadagan ang biktima og nangayo og tabang sa iyang pamilya ug gidala sa duol nga tambalan aron mahatagan og medical assistance ug anaa na kini sa luwas nga kahimtang. 

Nakit-an sa anak sa biktima nga naglakaw ang suspek sa may General Maxilom Avenue mao nga  nangayo kini og tabang sa kapulisan hinungdan sa pagkasikop. / JDG