Ben Madilynn
Nadangat sa tambalanan ang usa ka drayber sa dihang nakulob ang sports car nga iyang gimaniho sa national highway sa Barangay Owak, lungsod sa Asturias, alas 3:00 sa kaadlawon, Biyernes, Septiyembre 20, 2024.
Ang biktima nga naangol nga nagmaniho sa Suzuki Esteem giila sa kapulisan sa nganlan nga ‘Mart’, 36, minyo, ug taga Sityo Combado, Brgy. Cantuod, lungsod sa Balamban.
Sa pasiunang imbestigasyon sa kapulisan sa Asturias ubos sa kamanduan sa ilang hepe nga si P/Maj Alden Zambrano nahibaw-an nga ang biktima ang nagbiyahe pauli sa Balamban ug giingon nga ang biktima nawad og kontrol sa sakyanan nga napunta sa kilid sa karsada ug nabangga sa usa ka punoan sa kahoy dayong nakulob nga na resulta sapag ka danyos sa sports car ug pagkaangol sa biktima.
Ang emergency rescue team sa Asturias maoy nidala sa biktima ngadto sa Asturias Infirmary ug luwas na ang kahimtang niini. / DVG
