abyasa
LAOAG CITY – Inpakaammo ni Sangguniang Panlalawigan Jason Perera nga adda ti nagbalin a problema ti Barangay Madiladig ditoy siudad ti Laoag, gapu iti ginatangda a lote ket maysa kadagiti highest bidder iti government auction nga inaramid ti lokal a gobierno ditoy siudad kalpasan ti adu a tawen ti napalabas.
Segun kenkuana, naideklara a null and void ti nadakamat a bidding iti lote a nagatang ti barangay.
Saan a nasurot dagiti dati nga opisiales ti kasapulan a proseso a masapul a masurot babaen ti Local Government Code, isu a maibilang kas under peril ti pondo nga iruar ti Barangay Madiladig mainaig iti panaggatang iti lote nga aggatad iti P1.5 million ken pannakaibangon ti basketball court.
Gapu iti panagliway dagiti dati nga opisiales ti siudad ket saan a natarimaan ti nadakamat nga isyu.
Kinunana a rumbeng a matarimaan dagiti kastoy nga isyu nangruna no masurot dagiti proseso ti panaka-auction ti nasao nga lote.
Innayonna a no sinurot dagiti opisiales ti siudad dagiti kasapulan a proseso iti panag-auction iti lote ket awan ti nagbalin a parikut ti nasao a barangay.
Kabayatanna, adda ti maangay a panagtataripnong kadagiti naglako iti nadakamat a lote, barangay officials, ken Sangguniang Panlungsod tapno pagsaritaanda ti nadakamat nga isyu.
