Siyudad sa Bogo, Minglanilla, Sibonga adunay bag-ong hepe

Pormal nga na nga nilingkod sa katungdanan ang tulo ka mga police official sa Cebu Police Provincial Office sa bag-o nila nga mga assignment sa lalawigan sa Sugbo.

Ang bag-ong hepe sa Bogo City police station mao na si Police Lieutenant Colonel Allan Rosario gikan sa Mandaue City Police Office. Si Police Major Mark Don Alfred Leanza gikan sa Abellana Police Station sa Cebu City Police Office mao na ang hepe sa Minglanilla Police Station samtang si Police Captain Feb Seares ang pangulo sa kapulisan sa lungsod sa Sibonga.

Nangulo sa turn-over ug assumption ceremony sa sulod sa kampo sa Cebu Police Provincial Office (CPPO) mao si P/ Col. Percival Zorilla, hepe sa CPPO.

Gidayeg ni Zorilla ang mga police official nga gipanghulipan sa katungdanan nga mopaubos sa napulo ka buwan nga mandatory schooling alang sa pagka polis tungod sa maayong performance niini sa ilang assignment.

Mando niya sa mga bag-ong station commander sa tulo ka mga police station nga ipa­dayon ang paghatag sa serbisyo sa ilang komunidad ug pagpatuman sa kahusay ug kalinaw.

Masaligon siya sa iyang mga station commander nga mapa­dayon ang mga programa nga nasugdan labina batok sa gidiling drugas. / AYB