Sikyu naligsan, patay

Patay ang 36-anyos nga security guard human dasmagi sa naghaguros nga motorsiklo alas 6:48 sa buntag sa Biyernes, Mayo 30,2025 didto sa A.S. Fortuna Street, Barangay Banilad, Mandaue City.

Ang biktima giila nga si Joseph Avila Gabutan, taga Cagayan de Oro City ug kasamtangang nagtrabaho isip security guard.

Basi sa imbistigasyon, nita-bok sa karsada si Gabutan gikan sa showroom sa brand sa sakyanan sa dihang naligsan  sa naghaguros nga motorsiklo.

Ang motorsiklo, usa ka Yamaha VMAX BKAK 2025 nga matte light gray ug black, gimaneho sa usa ka 27-anyos nga lalaki nga naila lang sa iyang alyas nga Ed.

Ang suspek, residente sa Mactan, Lapu-Lapu City, paingon unta sa Cebu City sa dihang nahitabo ang insidente.

Sumala sa inisyal nga imbestigasyon sa kapulisan, parehong nangatumba sa sementadong dan ang drayber ug ang biktima human sa bangga, ug nakaangkon og mga samad. 

Gidala si Gabutan sa Mandaue District Hospital apan gideklarar nga dead on arrival pagka-alas 6:55 sa buntag ni Dr. Tyrill Joseph G. Aliño, ang attending physician.

Kasong reckless imprudence resulting in homicide ang giandam sa kapulisan batok sa suspek. / CAV