abyasa
LAOAG CITY – Namalo ti maysa a senior citizen babaen iti baseball bat iti Brgy. 24 Sta. Monica iti ili ti San Nicolas.
Basar iti San Nicolas Municipal Police Station, nabigbig ti biktima a ni Jimmy Transfiguracion y Basilio, agtawen iti 63, naasawaan idinto a nabigbig met ti suspek a ni Rene De Vera y Arcellana, agtawen iti 44, awanan asawa nga agpada dagitoy a residente iti nasao a barangay.
Basar kadagiti otoridad, agarup alas 7:30 ti bigat ket adda ti nabara a panagsinnungbat dagiti dua a nangitunda ti panagdinnanog dagitoy.
Naammoan a napan nangala ti suspek ti baseball bat ken inmalona iti ulo ti biktima iti sumagmamano a daras iti saan pay a masinunuo a rason.
Gapu iti daytoy, naitaray iti Governor Roque B. Ablan Sr. Memorial Hospital ti biktima para iti naan-anay a pannakatamingna.
Kabayatanna, natiliw met laeng ti suspek iti pagtaenganda iti Sitio 6, Brgy. 24 Sta. Monica iti ili ti San Nicolas ken narekobre ti baseball bat a maipagarup nga inusar ti suspek.
Iti agdama, agtultuloy pay laeng ti maiwaywayat a naun-uneg nga imbestigasion dagiti otoridad maipanggep iti nasao nga insidente.
