Send Off Program, naiyuswat para kadagiti atleta ti DepEd – Ilocos Norte nga agturong idiay Cebu para iti Palarong Pambansa 2024
abyasa
LAOAG CITY – Naiyuswat ti Send Off Program para kadagiti atleta ti Department of Education – Ilocos Norte nga agturong idiay Cebu para iti Palarong Pambansa 2024.
Daytoy ti inpakaammo ni Atty. Donato Balderas Jr., Schools Division Superintendent ti Department of Education – Ilocos Norte.
Segun kenkuana, ti team Ilocos Norte ket bukbuklen ti 101 nga indibidual pakairamanan dagiti atleta, coaches, technical officials ken chaperone.
Inbatadna a kalpasan ti Send Off Ceremony ket nagluganda ti bus nga agturong idiay Metro Manila nga isu iti paglugananda iti barko a mapan idiay Cebu.
Kunana a nakasagana dagiti atleta gapu iti naiget a panagsanayda kabayatan ti kaaddada ditoy probinsia.
Mangnamnama ni Balderas a makagun-od dagiti umaayam ti gold, silver ken bronze medals nangruna iti ay-ayam a softball no sadino a nangabak ti team Ilocos Norte iti umuna a gundaway idi napalabas a tawen ken runner up iti baseball.
Mainaig iti daytoy, nagyaman ti Schools Division Superintendent kadagiti amin nga adda iti likudan ti panagsanay dagiti atleta agingga iti panagturongda idiay Cebu kangrunaanna iti tulong ti gobierno probinsial.
Kabayatanna, naammoan a ti pormal a panangrugi ti panagbibinnalubal ti 2024 Palarong Pambansa ket inton Hulio 11 agingga iti 15 ita a tawen.
