Senado, ipaarestar da ni Bamban, Tarlac Mayor Alice Guo no saan pay laeng nga agparang iti sumaruno a hearing

LAOAG CITY – Adda posibilidad nga ipaarestar ti Senado ni Bamban, Tarlac Mayor Alice Guo no saan pay laeng nga agparang iti hearing da inton Hulio 10.

Daytoy ti inpakdaar ni Senador Sherwin Gatchalian kalpasan a saan a timmabuno ni Guo iti immuna nga imbestigasion ti Department of Justice ken ti laeng abogadona ti timmabuno iti imbestigasion.

Impetteng ni Gatchalian, a saanda nga ipalubos a saan a tumabuno ni Guo ken ti laeng abogadona ti sumango iti hearing ti Senado gapu ta adda subpoena nga ipatulod ti Senado iti Mayor tapno pilitenna nga agparang iti hearing.

No ipilit ti Mayor a saan na a sanguen ti imbestigasion, mapilitanda nga ipa-contempt  ni Guo ken mabalin a mangipaulog da iti warrant of arrest.

Kabayatanna, patien ni Gatchalian a saan a madanagan ni Mayor Guo, gapu ta naaramid na metten ti agulbod iti sango ti Senado.