Seguridad sa prisuhan pahugtan, palusot sa kontrabando

Nipasalig ang bag-ong Regional Director sa Bureau of Jail Management and Penology (BJMP) Central Visayas nga si Jail Chief Superintendent Luisito Muñoz nga iyang hatagan og pagtagad ang problema sa mga jail facility sa tibuok rehiyon.

Matod ni Muñoz atol sa press conference sa Miyerkules, Mayo 28, 2025, nga nasayod siya nga dunay mga Person Deprived of Liberty (PDL) nga nalambigit  gihapon pagpayuhot sa ilegal nga drugas sa gawas gamit ang mga cellular phones.

Tungod niini molusad sila og subsob nga greyhound operation sa pakig-alayon sa Philippine Drug Enforcement Agency 7 ug pag-deploy sa mga bag-ong graduate nga mga jail personnel sa National Jail Management and Penology Training Institute sa Negros Occidental.

Ang maong mga bag-ong graduate nga jail personnel mokabat og 122 diin 43 niini mga babaye ug 79 ang mga lalaki.

Sa nasayran, kasagaran sa madakpan sa mga polis sa Siyudad sa Sugbo nga mga drug personality mangangkon nga ang ilang contact naa sa sulod sa Cebu City Jail.

Kini nga problema wala pa maresulbar bisan pa man nga duna nay gihimong lakang ang kapulisan aron mahunong ang pagsuplay sa gituohang shabu diha sa kadalanan.

“Yung gagawin natin is, we will intensify the conduct of greyhound operations mayron naman tayong mga bagong graduates who will utilize them to conduct greyhound operations and paiigtingin natin yung pag-sesearch ng mga bisita,” matod ni Muñoz.

Nipagawas na sab og kamanduan si Muñoz nga kon dunay masakpan ug mapamatud-an nga jail personnel nga nagpalusot og mga kontrabando sama sa cellular phones ug ilegal nga drugas, mag-atubang kini og kaso ug ipataktak niya sa serbisyo.

Iyang gibutyag nga dili siya makatugot nga dunay jail officer nga malambigit sa ilegal nga kalihukan.

“Mayron na rin akong directives na ‘yung mga personnel natin na mapapatunayan na nagpapasok ng kontrabando sa loob particularly cellphones and drugs they will met the maximum penalty of dismissal from the service,” dugang ni Muñoz.

Si Muñoz nga kanhi Regional Director (RD) sa BJMP sa National Capital Region sa wala pa siya mabalhin sa Central Visayas duna nay lima ka jail personnel ang gipa-dismiss sa serbisyo tungod sa susamang kalapasan.

Kon dunay mogawas nga pangalan sa usa ka PDL nga maoy tinubdan sa suplay sa illegal nga drugas, ila dayon kini nga ipaubos sa imbestigasyon.

Dunay 43 ka jail facility ang BJMP 7 sa tibuok Central Visayas ug mo-total sila karon og 17,857 ka PDL ug ang congestion rate nila moabot  sa 299 percent.

Sa 17,857 ka PDL 74 porsiyento sa tibuok populasyon niini pulos nag-atubang og kaso sa ilegal nga drugas.

Ang BJMP 7 duna la’y 2,064 ka mga jail personnel nga mobantay sa 43 ka jail facility.

Subay niini nakatutok ang BJMP sa programa nga mao ang pag-decongest sa mga priso.

Gikan sa Enero hangtod Marso 2025, nakapagawas na sila og 1,700 ka mga PDL pinaagi sa Para Legal Services.

Gipasigarbo ni Muñoz nga giestablisar nila ang education behind bars sa pakig-alayon sa Cebu Technological University aron makapadayon sa pagtungha sa kolehiyo ang mga PDL bisan naa sa sulod sa bilangguan. Sa kasamtangan dunay 2,961 ka indibiduwal ang naka-enroll sa alternative learning system sa tibuok pasilidad sa BJMP 7. / AYB