Seguridad sa kadagatan gipalig-on

Mga kapitan sa barko ug military officers sa kadagatan gikan sa kapin 50 ka mga nasod sa tibuok kalibutan, nagtigum alang sa pagpalig-on sa maritime security.

Moabot ngadto sa 100 ka mga delegado gikan sa 54 ka mga lain laing nasod sa Indo Pacific Region ang mibisita dinhi sa Sugbo aron nga motambong sa tinuig nga kalihokan sa IORIS Steering Committee.

Karong tuiga didto ni gipahigayon sa usa ka resort nga nahimutang sa Barangay Punta Engaño sa Dakbayan sa Lapu-Lapu.

Ang Indo Pacific Regional Information Sharing (IORIS) platform usa ni ka computer system nga gigamit sa mga marino ug sa militar aron sa pag-ila sa mga barko nga mangagi sa dagat. 

Pinaagi niini dali rang mailhan ang mga hulga ingon man makahatag ni og seguridad sa kadagatan pinaagi sa pagbayloay og impormasyon sa isig ka nasod.

Sa pagsugod sa duha ka adlaw nga IOSIS Steering Commitee gitambongan kini sa European Union Ambassador to the Philippines nga si Massimo Santoro.

Gipasabot ni Santoro nga usa sa katuyoan sa ilang gibuhat aron nga mapadayag ngadto sa mga kapitan sa barko ug mga maritime military representatives ang ilang gi-upgrade nga IOSIS 4 nga mas advanced pa ug user friendly. 

Kining gipalambo nilang sistema, mas mapalig-on pa ang seguridad sa kadagatan ug dali rang masubay ug mailhan ang mga illegal nga kalihukan sa mga barko, sama sa illegal fishing, illegal drug trafficking, ug uban pang ginadili nga smuggling.

Mas mapasayon na ang mga operasyon nga himuon sa mga sakop sa Coast Guard ug Navy sa ilang mga search and rescue operation, medical evacuation, fire emergency sa mga barko, o kining man-overboard.

Sagad sa mga nitambong sa maong kalihukan mao ang mga pangu ug mga representante gikan sa Coast Guard, Navy Intel, Customs, Port Police, ug uban pang mga maritime agencies sa Asya ug sa Europa.

Ang nag develop ug nagmugna ining IORIS platform mao ang Crimario 2 project nga gipangulohan sa ilang director nga si Martin Cauchi Inglott. 

Matod pa ni Inglott sa iyang diskurso nga pinaagi sa sistema nga ilang gigama sukad niatong tuig 2018 ubay ubay na ka mga kaso sa illegal drug trafficking, smuggling, ug mga kaso sa pirata ilang napakgang pinaagi sa tabang sa IOSIS ingon man daghan nang kinabuhi ang ilang naluwas o na-rescue sa kadagatan. / ANV