‘Scorpion’ nakuhaan og P476K nga shabu

Scorpion sa Mambaling sa Dakbayan sa Sugbo nga nalambigit sa pagpamaligya sa ilegal nga drugas ang nadakpan atol sa gilusad nga buy-bust sa mga sakop sa PNP Drug Enforcement Group-Special Operations Unit 7 alas 2:53 sa kaadlawon, Biyernes, Hunyo 5, 2025 sa Sitio Tugas, San Roque Street sa maong barangay.

Ang nadakpan giila nga si Allan Ebis Tabalin alyas “Scorpion”, 58, nga residente ra usab sa maong lugar.

Nakuha gikan kaniya ang mga pinakete sa gituohang shabu nga gisulod sa blue nga pouch nga motimbang sa 70 gramos nga dunay standard drug price nga P476,000.00.

Sa imbestigasyon sa kapulisan nasayran nga si Scorpion unom ka tuig na nga nabilango sa New Bilibid Prison niadtong 2006 ug nakagawas pagka 2012.

Nigawas ang iyang pangalan nga maoy nag-caretaker sa supply sa illegal nga drugas sa iyang amo nga naa sa sulod sa bilanguan hinungdan gipaubos siya sa surveillance sulod sa usa ka semana.

Human makuha ang tanang impormasyon gilusad dayon ang anti-illegal drug operation nga miresulta sa iyang pagkasikop.

Giingong makabaligya ang suspek og 50 ngadto sa 100 gramos sa shabu ug ang iyang area mao ang tibuok barangay Mambaling ug mga kasikbit nga mga lugar.

Kalapasan sa Section 5 ug 11, Article II, Republic Act 9165 ang ipasaka nga kaso sa PNP batok sa maong suspek. / AYB