‘Scam hub’ gisusi sa Anti-Cyber Crime Group 7

Gi-serve sa Anti-Cyber Crime Group (ACG) 7 ang search warrant nga giluwatan ni Judge James Stewart Ramon E. Himalaloan sa RTC Branch 7 sa Dakbayan sa Sugbo niadtong establisemento nga giingong ‘scam hub’ nga nahimutang sa 2nd Floor, Unit 11B, The Gallery, Pope John Paul II Avenue, Barangay Kasambagan. 

Kini subay sa kalapasan sa Section 11 sa Republic Act 11765 o Financial Products and Services Consumer Protection Act in relation sa Section 6 sa RA 10175.

Kauban sa ACG ang mga sakop sa Cebu City Police Office, Criminal Investigation and Detection Group 7, Cybercrime Investigation and Coordinating Center sa Department of Information Communication and Technology (DICT), ug Business Permit Division sa siyudad. 

Ang BMJ Data Processing Services gipasanginlan nga nalambigit sa investment scam nga nabulgar sa usa ka YouTube nga hacker sa dihang iyang nasudlan ang system sa ilang computer lakip na sa CCTV camera niini.

Matod ni Police Lieutenant Colonel Maria Theresa Macatangay, deputy city director for operation sa Cebu City Police Office nga ang makuha nga kagamitan ipaubos sa examination sa ACG 7 aron mokuha og data nga mahimong ebedensiya sa pagpasaka nila og kaso ngadto sa korte.

“Kailangan man nato nga ma extract diha sa iyahang RAM ug sa iyahang memory devices nga naa diri gud currently nga gi-collect sa atoang evidence custodian kon duna pay other data and material evidence that will support the case nga gi-apply nato kon unsa pa gani makit-an pa nga other pieces of evidence,” matod ni Macatangay. / AYB