Ben Madilynn
Usa ka babaye nga sakop sa drug group nga Tres Marias nga naglihok sa Central Visayas (CV) ang nasikop ug nakuhaan og P7.8 milyunes nga balor sa illegal drugs atol sa buy-bust sa Regional Police Drug Enforcement Unit (RPDEU) 7 uban sa Police Enforcement Group-Special Operations Unit 7, alas 6:30 sa gabii, Huwebes, Oktubre 3, 2024 sa 5th Street, Villa San Rafael, Barangay Labangon, dakbayan sa Sugbo.
Ang nasikop giila sa kapulisan nga si Marilyn Entoma Bayang, 49, residente sa dalan A. Lopez, Barangay Labangon apan kasamtangan nga nagpuyo sa Lower Pakigne, lungsod sa Minglanilla.
Nakuha sa mga operatiba ang 13 ka dagkong putos sa gituohang shabu nga motimbang sa 1,150.00 gramos nga dunay standard drug price nga P7,820,000.
Usa ka buwan nga gipaubos sa monitoring si Bayang human migawas ang iyang pangalan nga nalambigit sa ilegal nga drugas ug sakop sa Tres Marias.
Giingong makabaligya og lima ka kilo matag semana ang suspek diin ang iyang area sa distribution mao ang Metro Cebu.
Ang iyang agalon naa sa sulod sa Cebu City Jail ug tua usab sa New Bilibid Prison sa kaulohan nga mohatag niya og supply sa ilegal nga drugas.
Ang kapulisan duna nay pangalan kung kinsa ang suppliers nga naa sa bilanggoan apan wa una kini gibutyag alang sa dugang imbestigasyon. / AYB
