Rider nga mi-counterflow, patay sa bangga

Patay na nga nadangat sa pribadong tambalanan ang 31 anyos nga driver sa motorsiklo human nibangga sa gikasugat nga Ford pick-up sa flyover sa Governor Cuenco Avenue sa Siyudad sa Sugbo sa alas 3 sa kadlawon, Sabado, Mayo 31, 2025.

Ang nakalas giila nga si Daryl Curiba, 31, taga Barangay Buhisan sa Dakbayan sa Sugbo nga nakaangkon og dakong kadaot sa ulo ug lawas.

Sa imbestigasyon sa Traffic Enforcement Unit (TEU) sa Cebu City Police Office, nga paingon sa Cabantan si Curiba apan pag-agi niya sa flyover ni-overtake kini sa laing sakyanan pinaagi sa pag-counterflow sa pikas lane ug iyang nakasugat ang Ford pick-up nga gimaneho ni Carmelo Abao Inocando, 48, taga Nasipit Road, Barangay Talamban sa Siyudad sa Sugbo.

Tungod sa kakusog sa dagan ni Curiba, wala na kini makalihay og nibangga sa walang bahin sa hood sa pick-up ug nalagpot.

Dali nga gidala ang biktima sa tambalanan sa nirespondeng medical team sa kagamhanan sa Dakbayan sa Sugbo apan tungod sa dakong kadaut sa ulo nakabsan gyud kini sa iyang kinabuhi.

Gikustodiya sa TEU ang driver sa pick-up nga si Inocando alang sa pagpasaka og kasong Reckless Imprudence Resulting in Homicide.

Apan ang hepe sa TEU nga si Police Lieutenant Colonel Jomar Medil nibutyag nga dili na mopasaka og kaso ang kabanay sa biktima hinungdan nga gi-release nila si Inocando. / AYB