Programa sa edukasyon gitinguha ni PB-elect Sanchez

Scholarship program ang tutokan sa umaabot nga Provincial Board Member, Malcolm Sanchez sa higayon nga pormal na siyang molingkod sa iyang katungdanan sa Kapitolyo sa Sugbo.

Si Sanchez nga motapos sa iyang termino isip konsehal sa Siyudad sa Mandaue niingon nga ang gisugyot nga scholarship nagtumong sa pagtabang sa mga estudyante nga academically deserving apan naglisod sa pinansyal aron makapadayon sa ilang pagtuon.

Matod niya nga ang programa maoy iyang prayoridad ilabi na tungod sa iyang adbokasiya alang sa accessible ug inclusive nga edukasyon.

“This scholarship will be for students nga deserving and at the same time, kadtong mga estudyante nga lisod gyud ipa-eskwela sa ilang ginikanan,” matod ni Sanchez sa interview.

Matod ni Sanchez nga ang iyang plano nagkinahanglan pa og dugang pagtuon, ilabi na sa pinansyal ug sa pundo nga gamiton.

Iyang giila ang kamahinungdanon sa paghimo og malungtarong programa nga dili makapabug-at sa budget sa probinsya apan makahatag og dakong epekto.

Siya naglaum nga si Governor-elect Pamela Baricuatro ug ang iyang mga kauban sa Provincial Board mosuporta sa iyang plano nga iyang gituohan nga nahiuyon sa mas lapad nga mga paningkamot sa pagpalambo sa kinabuhi sa mga Sugbuanon pinaagi sa edukasyon.

Ang track record ni Sanchez sa Mandaue naglakip sa pagduso sa mga reporma sa edukasyon ug mga programa sa pagtabang sa estudyante.

Siya niingon nga naghinamhinam siyang dad-on kini sa provincial level.

“Sa Mandaue, nakita nako gyud ang epekto kung naa’y suporta sa education. I want to bring that impact to more students across the province,” matod niya. / CAV