Pope Leo XIV mi-update sa iyang Peruvian Citizen

LIMA, Peru — Wala kalimti ni Pope Leo XIV ang iyang mga responsibilidad isip Peruvian citizen kay gi-update niya ang iyang impormasyon sa national registration niadtong Biyernes gamit ang iyang bag-ong address sa Vatican ug usa ka headshot.

Ang national registry sa Peru namahayag nga gi-update sa Santo Papa ang iyang impormasyon isip kabahin sa paningkamot sa South American nga nasod nga masubay ang mga Peruvian citizen sa tibuok kalibutan.

Natawo si Leo sa Estados Unidos apan nahimong Peruvian citizen napulo ka tuig na ang milabay.

Upat ka Peruvian nga opisyal ang nakigkita sa Santo Papa sa Vatican headquarters ug gikuha ang iyang fingerprints ug pirma, sumala sa pahayag gikan sa National Registry of Identification and Civil Status.

Si Miguel Stigler, usa ka public information officer sa registry, nitug-an sa The Associated Press nga gipakita ni Leo nga buot niyang kuhaon ang iyang updated identity document sa umaabot nga pagbiyahe sa Peru.

Wala pa masayri ang mga plano sa pagbiyahe sa Santo Papa paingon sa Peru.

Gihatagan si Leo og Peruvian citizenship niadtong Agosto 2015, ang panahon sa wala pa siya gitudlo ni Pope Francis, isip obispo sa Chiclayo, usa ka siyudad sa amihanang bahin sa nasod.

Aron mahimong kwalipikado, kinahanglan siyang mopuyo sa Peru sulod sa labing menos duha ka tuig ug makapasar sa civics test.

Ang tanang hamtong nga Peruvian, lakip ang mga naturalized citizen, gikinahanglang mobotar sa eleksyon hangtod sa edad nga 69.

Ang pagboto sa presidential election sa Peru sa sunod Abril dili mandatory alang kang Leo.

Mag 70 na siya karong Septiyembre. / AP