Ben Madilynn
Polis naangol human duha ka armado nakigpinusilay, alas 9:40 sa gabii, Miyerkules, September 18, 2024, sa Tagotago Beach sa Brgy. Cotcot, lungsod sa Liloan.
Si Police Corporal Ina Lagnasan, 30, minyo, sakop sa Liloan Police Station, naigo sa iyang ubos nga bahin sa bukobuko.
Si Police Chief Master Sgt. Arne Goc-ong, imbestigador sa Liloan Police Station nahinabi sa Superbalita Cebu, niingon nga luwas na ang kahimtang sa ilang kauban.
Apan, atol ning pagsuwat, ilang gihimo sa hot pursuit sa pagsakop sa nakaikyas nga mga suspek nga sila si Fernan Maricuelo, hingkod ang panuigon, ug Jason Yrogirog, pulos residenti sa maong dapit.
Matod ni PCMS Goc-ong, usa ka Jose Juvy Capono, nangayog pakitabang nila sa kapulisan human ang suspek mangharas ug nagdala armas nga nagsige’g pasingit uban sa pagpakita sa armas.
Ang ilang lima ka mga intelligence operatives daling misusi sa dapit uban sa reklamante apan ang mga suspek nag-atang nang daan sa lugar.
Sa pag-abot sa kapulisan, gipamusil gilayon hinungdan nga nahitabo ang sinukliay sa mga bala ug naigo sa likod si Lagnasan.
Ang mga suspek nakasibat sab kay misum-ok sa mga bagang punoan sa mga bakhaw.
Si Goc-ong nibutyag nga ang mga suspek nailang badlungon sa ilang lugar.
Si Fernan nabalingo sa daghanga kaso ingon man nalambigit sa illegal drugs activity.
Subay niini, sumala ni Goc-ong, naa na sa stable nga kahimtang ang ilang kaubang polis nga naa sa pribadong tambalanan sa Dakbayan sa Mandaue./GPL
