Ben Madilynn
Usa ka polis ang napalgang patay sa sulod sa comfort room (CR) sa ilang panimalay sa Sitio Simborio, Barangay Tayud, lungsod sa Liloan, ala 1:30 sa kaadlawon, Huwebes Enero 9, 2025.
Giila ang namatay nga si Police Staff Sgt. Merlou Molo Mercader, 37, minyo, nagpuyo sa nahisgutang lugar, ug nadestino sa Traffic Enforcement Units (TEU) Cebu City Police Office (CCPO).
Si Police Chief Master Sgt. Arne Goc-ong, imbestigador sa Liloan Police Station, mibutyag sa Superbalita Cebu nga ang inahan sa polis nga si Myrna maoy unang gisumbongan sa iyang 4 anyos nga lalaki nga apo.
Ang bata natingala kon nganong dugay ang iyang papa sud sa CR ug wala kini mangabli bisan giunsa niya sa pagtuktok hinungdan nga nisumbong kini sa iyang apuhan.
Ang asawa nga nakadungog sa sumbog sa bata nikuyog sa iyang ugangan ug ilang gituktok ang pultahan sa CR apan wala gihapon mangabli hinungdan ilang gipugos pag-abli kini.
Dihang naabli na, nakurat sila sa ilang nakita nga nagbuy-od nga hubo ug nagbuwa ang baba.
Sumala sa inahan, ang iyang anak niabot sa ilang panimalay ala 11:00 sa gabii sa Miyerkules, Enero 8, 2024, gikan nag-duty sa TEU-CCPO.
Sa pag-abot niini, dugang sa inahan, nag-ilis ug dayon naligo.
Wala isalikway sa kabanay ingon man sa kapulisan nga giataki sa sakit sa kasingkasing.
Hinuon, gisugyot sa kapulisan nga ipa-autopsy ang lawas sa namatay aron masuta unsay namatyan niini.
Dugang ni Goc-ang ang maong polis himsog ang panglawas, gani mahilig kini sa pagduwa sa basketball.
Matod pa, si Mercader daling gidala sa mga sakop sa responders sa Tayud sakay sa rescue van ngadto sa Eversly General Hospital sa siyudad sa Mandaue apan gideklarar kini nga dead on arrival sa attending physician nga si Rosalie G. Torres. / dugang ni GPL
