Ben Madilynn
Patay ang usa ka pintor human aksidenteng natagak gikan sa ika-17 nga andana sa gitrabahoan nga condotel building sa dalan Lapu-Lapu, Barangay Apas, Dakbayan sa Sugbo, alas 9:50 sa gabii, Lunes, Septiyembre 16, 2024.
Ang biktima giila sa iyang mga kauban sa trabaho nga si Michael Isidro, 30, residente sa Barangay Tangke, siyudad sa Talisay apan lumad nga taga Davao.
Matod ni Police Major Romeo Caacoy Jr., hepe sa Mabolo Police Station, nga nakadawat sila og tawag sa telepono nga dunay tawo nga natagak sa building samtang nagtrabaho.
Dali nga niresponde ang mga polis sa pagpangulo ni Police Staff Sergeant Bryan Bolongon ang investigator on case ug ilang naabtan ang biktima nga nagbuy-od na sa manhole sa building.
Gisugdan dayon nila ang imbestigasyon ug sigon sa pamahayag sa iyang higala nga kauban usab sa trabaho nga si Joey Anonuevo, 26, lumad nga taga Negros Occidental apan kasamtangan nga nagpuyo sa Upper Peace Valley, Barangay Lahug sa Dakbayan sa Sugbo, nga niundang sila sa overtime sa alas 8 sa gabii tungod sa dili maayong dagan sa panahon.
Apan natingala siya nganong wala mo-punched out sa daily time record niini ang biktima human sa ilang overtime nga trabaho.
Tungod niini, nangayo siya og pakitabang nga pangitaon ug dako nalang ang ilang katingala nga napalgan nalang kini nga wala nay kinabuhi nga nabali-bali na ang kalawasan tungod sa pagka hulog gikan sa ika-17 nga andana.
Sigon ni Anonuevo nga panahon sa ilang pag trabaho dili gyud sila mokompyansa mag sul-ob gyud sila og harness sa metal grill sa aircon nga maoy labing lig-on nga sab-itanan niini.
Nagduda sila nga tungod sa kakusog sa hangin sa ibabaw subay sa nasinati nga dili maayong panahon napalid ang biktima ug nahulog kini.
Gibutyag ni Caacoy nga ilang palawman ang ilang imbestigasyon bisan pa man sa migawas sa pakisusi nga walay nakitang foul play.
Nakita hinuon sa imbestigador nga naputol ang harness nga gigamit sa biktima nga gituohan nga tungod sa kakusog sa hangin ang hinungdan.
“Among tan-awon kung dili ba kuan ra kaayo ang ilang safety huyang ra kaayo ba, pun-an pa sa medyo hangin-hangin nahimong factor,” matod ni Caacoy.
Ang kapuyo sa biktima nga si alyas Nene dili makatuo nga nadisgrasya si Michael kay sa milabay nga mga adlaw nagsige nalang kinig hinuktok.
Kaadlawon na usab siya gipahibawo sa iyang mga kauban sa nahitabo sa iyang kapuyo.
Awhag niya sa mga police nga nag imbestigar nga subayon pag ayo ang maong hitabo kung wala bay nagtukmod sa biktima. / AYB
